 伲社区里格王老头， 编了只快板有唱头。 要想晓得有啥花头， 认真听伊唱到头。 唱格就是门口头， 刚刚走过三家头。 男格剃只光郎头， 女格烫了只菊花头。 牵了伲子小光头， 一家门戴好口罩高高兴兴去外头。 正巧碰着志愿者大块头， 请伊拉看看宣传专栏上墙头。 讲的是，今年春节东南西北老百姓全勒摇头， 瘟神突袭，新寇肺炎害得大家触霉头。 政府号召党员干部来带头， 居家自我隔离勿昏头。 菊花头搭大小光郎头， 老老实实蹲勒屋里头。 幸亏居委干部上门头， 登记发售口罩严控严防真对头。 还勒网上微信群里发调头， 封城封村做对了头。 左邻右八舍，亲朋好友年夜饭亦勿碰头， 光郎头菊花头勒床前跳舞练脚头。 腊月梅花开过了头， 各地确诊伲上海是小头。 二月学堂开了头， 网上讲课小光头屋里练笔头。 三月海棠艳梢头， 迎来拐点好苗头。 武汉加油全国加油举拳头， 四月复工好兆头。 光郎头全家舒眉头。 小老酒咪咪啃鸭头。 公园有限复开，戴了口罩大家见面保持距离点点头。 虽然疫期过了浪头， 亦要爱心顾一顾外国格高鼻头。 是有少数热昏了头， 利令智昏对中国摇头嚼舌头。 大国担当亿万口罩专机运到， 有良心格朋友翘大姆指头。 勿拨病毒凶过头， 勿向西方低伲格头。 同心同德上上下下捏成一只拳头， 经济复苏企业回暖有苗头。 有苗头来有苗头， 紧跟北京信心十足，全国人民有奔头。 勇往直前，昂首挺胸，伲全国人民前途光明有奔头！ (责任编辑：晓歌) |
