截屏图片
落雨天屋里孵孵，翻翻老照片，看到小辰光勒马路边做游戏个情景，勾起了儿时个回忆。 照片是七十几年之前拍嗰，当时国家百废待兴，老百姓个生活还比较贫困，当时勿像现在呀，小朋友有介许多文体娱乐活动。小朋友个天性就是欢喜白相，阿拉呒没游戏器具、呒没大人指导、呒没游戏场地侪勿要紧，阿拉会自力更生想办法。啥个斗鸡、扯扯铃、滚铁圈、打弹子、刮刮片、掷飞镖、抽贱骨头……侪让阿拉欲罢不能。 其中记忆最深个游戏叫“官兵捉强盗”。每到丹桂飘香个季节，秋高气爽，月明星稀，秋虫轻鸣个夜晚，阿拉搿点小朋友吃过夜饭，就会自发去附近一个小广场，广场旁边有一对石狮子，迭个就是集合点。等人到得差勿多了，就有两个比较有号召力个小囡召集大家，组织游戏。先由伊拉两家头通过“啋咚哩啋”个游戏确定双方扮演个角色，赢个扮演“领军”，输个扮演“盗首”（也就是强盗）。再由两人分别招兵买马，扩充队伍。被招为“官兵”个小囡趾高气扬，被拉去当“强盗”侪垂头丧气。两派分好以后，“强盗头子”就带领小啰啰们想方设法躲避，勿让“官兵”捉到，同时想办法去“摸营”，抢到之前大家商定好个“官印”——一块碌砖或者一方木头。 游戏个规则是：勒了规定时间内，捉牢“强盗头子”或半数以上“强盗”嗰，为“官兵”胜。如果强盗“摸营”成功抢到“官印”则“强盗”胜，否则平局。 “官兵捉强盗”首先比拼个是体力，如果“强盗”体力不支，只好束手就擒，要是“官兵”腿软，只好看仔“强盗”溜脱。其次还要比拼计谋，双方利用夜色搭仔地形作掩护，“官兵”要排兵布阵，安排人手围追堵截；“强盗”也可以声东击西，调虎离山，制造“摸营”机会。虽然勒了游戏里擦破过皮，拉破过衣裳，跑坏脱过鞋子，受过爷娘个训斥，但回忆起迭个情境、迭个童趣，仍旧是埃个时代难忘个美好。 当年个小伙伴早已不知去向，少数仍旧有联系个也侪是耄耋之年了，偶尔聚会讲起“官兵捉强盗”，仿佛又回到了儿时，童心永驻，回味无穷。 责任编辑：日升 (责任编辑：日升) |
