摄影/日升
文/胡申南 辰光过得真快，已经过春节了，老古闲话讲得好：南圆子，北饺子，过春节北方人习惯吃饺子，阿拉南方人习惯吃圆子。上海人讲个圆子就是汤团，过年辰光一家人坐辣一道吃汤团，代表嗰是团团圆圆。 现在想吃汤团邪气便当，到超市里兜一圈就买回来了。勿像我小辰光，想吃汤团要自家磨粉自家做。当时，每家每户可以凭票买到糯米粉，但是可以买个数量不多，用来搓汤团是勿够嗰，所以大家侪改买糯米，买回来以后自家磨粉。 记得小辰光住辣外滩一条弄堂里，有十几间房子，住仔十几家人家。到了过年辰光，弄堂里就忙起来了，家家户户大扫除，汏床单，晒被头。弄堂里有七八家南方人家，过年包糯米汤团，侪要磨糯米粉，但是只有邻居李家爷叔屋里有一只石磨搭仔一只石臼，李家爷叔邪气认真，一般提前半个月就拿仔一张纸头，叫各家人家来预约用石磨个日脚。 我虽然从小就辣上海生活，但是阿爸姆妈侪是宁波人，所以我是吃宁波菜长大嗰。到了过年，磨点水磨粉，做点猪油汤团是常规操作。糯米预先要用清水浸两天，让米粒胀开来。用来磨米粉个石磨邪气笨重，一个人根本搬勿动，所以邻居也会来帮忙。石磨搬回来，先要仔细汏干净，再辣石磨下个凹槽浪套一只盛米粉个布袋，用绳子扎牢，下面再放只盆子接水。 推动石磨邪气吃力，所以是阿爸个生活，姆妈坐辣旁边，用调羮从面盆里舀出浸湿个糯米，加到石磨个孔洞里。石磨一圈圈转，糯米就变成雪雪白个米浆水，从石磨边浪一圈凹槽里流出来，进到布袋里，我也等辣旁边打下手。一家门一边做生活一边聊家常，有辰光勿当心，有米粒落到地浪，姆妈就拍拍我，我就蹲下来拿地浪个糯米一粒一粒拾起来，放到小碗里，等积累到一定数量就拿去用水冲干净，再交拨姆妈往石磨洞里倒。等到糯米全部磨成米浆以后，就要拿装米浆个布袋挂起来，让里向个水份沥干。做汤团个糯米粉就准备好了。包汤团用个馅也要自家做，先拿黑芝麻放到铁锅里炒熟，放进石臼，捣成芝麻粉。再准备一块白乎乎个猪油，搭仔一小碗绵白糖。三种料拌辣一道，用力揉捏，最后变成乌黑发亮个黑芝麻馅。 接下来包汤团就是阿拉一家门一道动手，拿糯米粉揉捏成团，分成大小一样个小块，再拍扁、放馅、搓圆…… 一晃几十年过去了，当年个石磨、石臼侪已经从生活中消失了，但是每当过年，我还是会回想起石磨吱吱呀呀转动个画面，回想起阿爸用力推磨个样子，回想起姆妈温柔个笑脸。 责任编辑：日升 (责任编辑：日升) |
