摄影/日升
文/赵妃蓉 最近看到新闻里讲顺昌路旧城改造前，居民们一道制作了记忆地图，既温暖又有意义。弄堂记忆拼了一道就组成了阿拉对搿个城市个记忆。看到顺昌路个展板以后，我小辰光住过个小马路就像一幅卷轴一样辣眼面前展开，鲜活得就像昨天一样。 小辰光我大部分辰光侪住辣市中心一条小马路旁边个弄堂里，花鸟市场造起来之前迭条小马路还算闹中取静，因为老早子搿条小马路旁边住了勿少大户人家，所以有几条小弄堂走到底，会有三面两层楼房围起来个大天井。对于搿点房子来讲，大天井会让整体空间搭仔每间房间个采光通风变得更加好，又有私密性。 后来，搿种原本一家一户个大院子里住进去交关人家，大天井就变成了几家人家个公共空间，汏衣裳、茄山河、吃饭、小人做功课，一天到夜侪邪气闹猛。记得阿拉小学里个合唱团每个礼拜去少年宫演出个辰光，演压轴节目——芭蕾独舞《天鹅之死》个小姑娘就住辣迭个房子里，经常穿仔白颜色个练功服，辣大天井里压腿练功。伊是我小辰光最佩服个艺术女神，每趟轮到伊上台演出，我侪会认认真真欣赏，看得津津有味，连带搿段芭蕾舞个配乐也深深刻辣我个记忆当中。长大以后，看芭蕾舞《天鹅湖》散场个辰光，听到有人讲哪能呒没听到搿段音乐，我就会辣心里暗好笑，迭个是圣桑《动物狂欢节》里个《天鹅之死》，哪能会辣老柴个《天鹅湖》里听到呢？ 记忆里大天井旁边有一个小人书摊头，简易个木头书架浪摆满连环画小人书，从《杨家将》到《唐太宗》，以及各种热门电影，应有尽有，租金也不贵，看一本只要3分洋钿。到书摊浪看小人书是我最开心个事体。 大人一直讲个苦夏，辣阿拉搿点小朋友心里是根本勿存在个，就算是下半天两点钟，太阳晒得最厉害个辰光，弄堂里个穿堂风吹辣身浪仍旧老适意嗰，我从来呒没辣弄堂里有汗流浃背个感觉。一边翻看小人书，一边享受弄堂天井里个清凉，风吹起花裙子，整理裙子个辰光抬头看看辣豁豁个太阳，好像是两个世界，心里个感觉既安静又美好…… 天井门口旁边有一口水井，到了热天，大人会辣旁边汏衣裳，下半天四五点钟个辰光，就会招呼阿拉到门口去泼点井水，让天井里个水门汀地面散散热，小朋友们就会趁机互相泼井水白相，顺便每户人家再到井里泡只西瓜，天井里也越来越闹猛了。 大天井还有一个老重要个作用，就是辣电视机还呒没普及个辰光，大家聚辣一道看电视。电影《我和我的祖国》里“夺冠”个故事当中，真实还原了弄堂里看电视个场景，但是电影里个是辣狭长个弄堂里，辣大天井里看个感觉要好得多，有点像露天电影院。 小辰光个弄堂记忆美好得就像白纸浪向随意涂鸦个五彩图画，清新得就像晨露，绚烂得就像雨后彩虹…… 责任编辑：日升 (责任编辑：日升) |
