 我是上海六八届高中生，1969年春天到外地插队落户七年多，76年夏天病退回来。因为我73年底勒外地胃做手术，切脱五分之四。 我勒街道机关个辰光勿长，总共只有一年半，但调过几个岗位，做过勿少工作，接触人蛮多。先勒街道图书馆，勿久调到联管组，做过会计、人事、后勤，参加过工作组，基层蹲点也去过，最后，借到街道政宣组，再创办职工学堂，教师、教务侪是一家头兼。所以对生产组，我还是比较熟悉个。 一、体制性质 从狭义讲，顾名思义，伊是从事简单生产劳动个组织。具体讲，就是以里弄居民为成员，承接工厂个一眼外加工生活。所以，“生产组”也叫“里弄加工组”，受居委会个领导。至于街道统一管理，是后首来个事体了。 当时个上海，有三种所有制，全民、大集体、小集体，由于还呒沒个体户，所以“生产组”是勒顶下头个。 先讲“生产”一路。一般侪是为正规工厂加工眼简单个零部件，所以，名称当中个业务部分也搭主体工厂相同或者相似。因为伊最早属于里弄，所以名称一般侪是“居委会+业务+组”。 紫阳手帕组→汉阳手帕厂，汇站螺丝组→星光螺丝厂，漕北机绣组→景福针织厂，庄家宅喇叭组→交通电器厂，北赵巷皂粉组→固本肥皂厂，龙山锁组→四新锁厂，南赵巷皮鞋组→宝屐皮鞋厂，鲁浦缝纫组→上海皮鞋厂等。 “生活”一路阿拉街道也勿少。服务站有“裕德”、“沈家宅”等以居委会冠名个，伊拉从事修补、裁缝、洗衣、理发等业务。幼儿园有三乐、潘家宅、天钥、鲁浦咾啥。饮食呢，有南海饭店、天钥食堂等。另外还有房修队、砖窑场等单位。 三、人员结构 为了多快好省建设社会主义，政府当时提出口号“解放妇女生产力”，让家庭妇女跨出大门、走上社会。"阿拉也有两只手，勿勒屋里吃闲饭”。所以讲搿也是新社会男女平等个一种体现伐。 1962年，一批支援新疆个上海人回来进“生产组”，后来陆续又有“社会青年”搭残疾人也拨安排到“生产组”。 挨下去就是“知青病退”。伊开始于上世纪70年代中、兴盛于七十代末，直到八十年代初，辰光长、规模大、人数多，一时头里风起云涌。病休病退个，侪是年轻人，伊拉先后进入，拨陈旧个“生产组”输入了新鲜血液，拨传统个“生产组”带来了蓬勃生机。 “生产组”原来个领导侪是“老阿姨”，“小青年”涌入之后，少数表现好、能力强个也走上领导岗位，入党，做干部了。团员就更加多了，每个“生产组”几乎侪有团支部。 四、工资待遇 我进生产组个辰光，每个号头是三十元零五角，后来加了“一眼眼”，是77年全上海“生产组”工资大调整个辰光。当时分四个等级，而且有比例个，两头尖、当中大，呈橄榄型。前者表现特别好，像先进工作者，后者曾经犯过错误个。大多数个“勿好勿坏、也好也坏，中不溜秋、芸芸众生”个，侪勒当中两级。评级流程也分四步：自我申报，群众评议，领导批准，上级审核。 当时，我是“工作组”成员，下基层参加工资评定。唉，迭个工作真是勿好做，容易得罪人，尤其是当领导个，真是难为伊拉了。 顺便提一提：由于“生产组”经济地位低，女青年寻对象往往要寻全民单位个，日后有得保障。搿个就造成了“生产组”里个男青年寻勿着对象。有辰光，就算是女青年心甘情愿，伊拉爷娘也未必会得同意，未来个“丈母娘”更加难通过。 五、双向流动 年轻人就勿一样了。“生产组”经济地位低，年轻人侪希望“跳槽”到全民单位去。当然，也有眼充满理想、胸怀“鸿鹄之志”个人。是个呀，人往高处跑嘛。搿个就决定了“生产组”人员个勿稳定性，经常有人离开。有几种情况： 后来恢复高考，对“生产组”个冲击是老老大个。交关人重新拿书，悬梁刺股，发奋图强，最后金榜题名，远走高飞。 上山下乡到后来，勿管有病沒病，只要是勒当地呒沒正式“上调”个未婚知青侪好回来了。据统计，伊段辰光，上海“生产组”前后一共接受了25万返城知青，搿个是啥个概念啊？ 进进出出、来来往往，象煞走马灯一样，邪气闹猛。出者，往高处走，上一个台阶，开心；进者，摆脱外地回来了，也开心。所以，无论“出”还是“进”，皆大欢喜，不亦乐乎。迭种双向流动，好像还真个有点“有人辞官回故里，有人漏夜赶考场”个味道。 不过入学之后，我身浪还有“生产组”个影子，勿好带薪。当时全民个、大集体个，哪怕是市郊农场个，侪是带薪读书个，原来工资一分勿少，只不过是呒沒奖金而已。而生产组来个，却搭应届毕业个“小朋友”一样，享受每月廿几块人民助学金，以前个十年勿算工龄个，侪白做了。迭种局面直到大学毕业、分配工作再结束。 斗转星移，人世沧桑，一晃，我离开“生产组”已经四十多年了。是啊，当时朝气蓬勃、充满活力个青年，现在侪变成功了日薄西山、风烛残年个老人。当年个伊眼“老阿姨”，大多数侪“作古”了。同样，后来“生产组”也发生了老大个变化。 由此可见，上海各个系统论变化，“生产组”算是顶顶大个了。 是个呀，勒时过境迁个今朝，我邪气怀念勒“生产组”度过个伊段辰光。 责任 编辑晓歌 (责任编辑：晓歌) |
