文并图/沈一珠
现在看微信多了，再加上还有小红书、抖音之类欢蹦乱跳嗰，勿过，对微博总还是有点牵挂。毕竟走过路过一个地方，辰光长了总归会有两个值得牵挂个朋友。 比方说，一个叫张鹤瑶个朋友，就是一个。天冷天热，胃口好坏，常常要去伊个微博里翻翻，看看有点啥新个关照。 跟交关讲得高深莫测个朋友勿一样，伊个建议侪是简洁明了，可以拿过来就用。比方讲，抄一个伊最近发个帖子：蔬菜排毒减肥，方便实惠。 小黄瓜：抑制碳水化合物转化为脂肪。 萝卜：避免脂肪在皮下堆积。 韭菜：促进肠蠕动。 冬瓜：能去掉体内过剩脂肪。 茄子：有科学研究指出茄子在一顿正餐中可以发挥阻止吸收脂肪的作用。 荷兰豆：可以加快身体新陈代谢。 芹菜：热量很低，吃多不胖。 最近，我常常吃个一样物事是西葫芦。以前侪是烧汤、或者炒肉片。吃多了，就有点厌，一是天热怕油腻，二是因为西葫芦一烧就酥，口感有点绵。所以，就改一种方法——凉拌。 凉拌个做法顶顶便当：开水里汆汆，酱麻油拌拌。只勿过，拿麻油调成芥末油，结果，本来平淡无奇个味道，一记头就变脱了。颜色清新如绿玉，口感绵柔带点爽。真真好吃得来。 食材：西葫芦一、二根，生抽、盐、糖及芥末油各少许。 做法：西葫芦汏清爽，先用刨刀轻轻交刨脱外皮，再拿果肉刨成薄薄长条，剩下来个芯子厾脱。水烧开，拿西葫芦薄片放到开水里汆一汆，马上撩起来，放辣冷开水里浸一浸，沥干，就可以摆到盘子里了。放盐、生抽、糖各适量，最后，看侬自家对芥末个耐受力搭仔欢喜程度，淋几滴芥末油进去，拌匀，就可以吃了。 责任编辑：日升 (责任编辑：日升) |
