 文并图/沈一珠 春天是吃嫩芽、新鲜叶子个辰光。 现在有交关人欢喜自家种菜，自己屋里有园子个，当然便当，自留地一垄一垄个，叫人眼痒煞；呒没园子个，就弄几只盒子种辣晒台里。叫伊绿色食品，就算长得瘦一眼，也勿施化肥；就算有虫，也勿打农药。伊拉讲起来，虫吃吃，人吃吃，和谐得一塌糊涂。 阿拉属于弄勿来个，养点花还要三日黄两日胖，只好尽量跟了时令吃。比方讲，搿歇辰光，就选香椿头、马兰头、枸杞藤、豆苗之类；香椿头基本上切成末末头，炒蛋，或者是拌豆腐，搭搭伊个香味道；马兰头斩一眼香干进去拌拌，吃上去勿会太涩嘴巴；其他嫩头菜，要么清炒，要么掺点竹笋丝一道炒炒，更加鲜一眼。 辣挑挑拣拣辰光，辣末生头看到一样物事：新鲜桑叶，8.8半斤。要预定个，三天后到货。呆一呆，搿是卖拨蚕宝宝吃个呢，还是人吃个？马上查一查，第一趟晓得，居然人也是可以吃个，四月份左右个桑叶，清香、甜美；打过霜个桑叶可以烘干仔泡茶。还有人讲了，蚕宝宝嘴巴刁，打过农药个桑叶，一吃就僵脱。所以，人可以老放心个吃。 越是新鲜物事，做起来越要简单，比如“凉拌桑叶”，只要两种原料：桑叶和酱麻油。 做法是：先拿桑叶用清水冲清爽；然后放到开水里汆1分多钟，撩出来；最后用冷开水过一过，酱麻油拌一拌就可以吃了。 味道呒啥特别，过仔两天，再想买一眼试试，呒没了。哪能总有一种跟蚕宝宝抢口粮个感觉？ 想想，人跟大自然还是要和谐相处，勿可以吃个物事，绝对勿去嘴巴馋；至于桑叶，还是留拨蚕宝宝吃口伐！ 好在，再过两个号头，桑树还会结一种叫桑葚个果子。直接摘下来可以吃，晒干以后，泡茶或者泡酒，侪老好吃。 责任编辑：日升 (责任编辑：日升) |
