摄影/日升
前几日出门办事体，路过桃江路，看见一段弹硌路。对我来讲，弹硌路一眼勿陌生，“弹”搭“硌”是搿种路个生动体现。 弹硌路大致有两种。一种是用勿规则，像拳头大小个花岗石铺设。因为搿种石头比较硬，为了节省费用，就勿拿伊磨平整了，所以看上去高高低低，拼缝弯弯曲曲，一般是弄堂或者小马路。搿种弹硌路用个辰光长了，路面会有凹塘，落雨天会积水，一个勿巧就会溅一身泥水。还有一种是用加工成两寸多见方个花岗石铺个弹硌路。搿种弹硌路用压路机压过，平整坚固，比弄堂里个弹硌路好交关。碰着落雨，因为路面当中高两边低，雨水会从石缝流到两边下水道，勿大会积水。我小辰光弄堂对面有条小路，就是用加工过个花岗石铺嗰，日里路边是小菜场，一到夜里，说书唱戏样样有，我天天要去轧闹猛。 埃歇辰光弄堂从早到夜交关嘈杂，弹硌路产生个噪声是重头戏，譬如脚踏车、黄鱼车个颠簸声；行人走路“呱嗒呱嗒”个脚步声；顶顶响个是垃圾车，“轰隆轰隆”像打雷。 老早弄堂居民侪要到接水站淘米汏菜或者汏衣裳，结束后一般侪会拎桶水回去，水辣桶里晃来晃去，走一路洒一路，就算大晴天，弄堂弹硌路也是湿溚溚嗰。石头表面光溜溜，碰着水就邪气滑。阿拉小朋友辣弄堂里跑来跑去，经常滑倒或者绊倒，常常是旧伤呒没好又添新伤。 时至今日，老早子个弹硌路侪已经被水泥路或者柏油路取代，我辣桃江路浪走仔一圈，搿段两百多米个弹硌路成了一条景观路。 责任编辑：日升 (责任编辑：日升) |
