 前几天去了一趟“北外滩城市集市”，看到一块水门汀场地浪向有一张用水泥板做个台子，几块红砖拿台面一分为两，活脱脱就是我小辰光勒了阳台浪白相过个乒乓球台。迭个场景让我感慨万千，种种回忆涌上心头。 1966年，阿拉屋里从市中心个遵义路搬到了西郊淮阴路。迭个是一幢老洋房，地面铺个是朱红色小方地砖，光滑漂亮，还有一个方方正正个大阳台。阿爸勒了阳台左边搭了一个灶披间，阳台右边用水泥、石子、细钢筋造了一个石板台子，用机器打磨得平整光滑，就是当时流行个磨石子台面。阿拉屋里个汏汏弄弄侪会用到伊。 埃歇辰光学堂布置个功课勿多，阿拉搿点小学生子放学以后有勿少白相个辰光，迭个大阳台就是我搭阿姐、阿弟白相个小天地。阿拉勒阳台浪跳房子、踢毽子、跳橡皮筋、打乒乓，也吸引了邻居小朋友来一道白相，其中打乒乓最受欢迎。只要勒了磨石子台面当中放两块砖头，上面放一根细竹竿，一只乒乓球台就搭好了。大家轮流上场，乒乓球起起落落，飞来飞去，发出清脆个声音，引得阿拉欢呼喝彩。迭只小小乒乓球让我磨练了球技，增强了体质，陪我度过了小辰光最轻松最快乐个时光。 一张石头台子，因地制宜，因陋就简，当成乒乓球台，想打就打，方便随意，也成就了交关乒乓运动员个乒乓梦。据说历史浪第一个获得国际乒联“世界最高教练员荣誉奖”个张燮林老先生就是勒菜场个石头台子浪打乒乓打出来个。 我从小到大一直欢喜打乒乓，现在年纪大了，还经常勒了打。前一抢我搭先生乘邮轮旅游，勒了一间舱室里看到一张乒乓球台，我搭先生两家头就常常去练球。自从社区活动室有了乒乓球台，常常能够看到我搭先生打乒乓个身影。春夏秋冬，四季更替，社区活动室成了我重拾儿时欢乐时光个好地方。 我有辰光会想，假使小辰光阿拉屋里呒没从遵义路搬到淮阴路，或者阿爸呒没做迭张石头台子，我个生活会有啥变化呢？勿管哪能讲，我认为每个人侪应该有一种欢喜个运动项目，搿对每个人个生理、心理侪是斜气有好处个。据说心理学家研究发现：运动有“短期情绪效应”。具体来讲，就是人勒了运动以后，焦虑、抑郁等负面情绪侪会大幅下降，愉快度会大幅提升。 心情低落个辰光不妨做做运动，跑跑步、踢踢球、打打拳、游游泳、打打乒乓……让自家动起来，可以减轻焦虑、释放压力。 现在个小朋友可以白相个物事比阿拉小辰光多得多了，但是学堂里个功课也多了，接触乒乓个机会就少了，我儿子就勿会打乒乓，不过伊倒是对篮球情有独钟。 责任编辑：日升 (责任编辑：日升) |
