 还没认得罗老之前，老早就听到伊当年写过篇轰动报坛个杂文《杂家》。1958年罗老担任上海出版局代局长，伊发现有同志勿重视编辑，就用笔名“骆漠”勒1962年5月6日《文汇报》浪发了篇《杂家——一个编辑同志个想法》，强调编辑工作个重要性，编辑应该具有各方面个知识，领导要关爱编辑，虽然讲编辑勿是某方面个专家，但好个编辑应该是个“杂家”。文章发表之后马上引起广大知识分子个共鸣。  罗老回顾自家个经历，伊是山东平度蟠桃镇人，3岁娘就没了，从小欢喜读《三国》《水浒》，12岁考进知务中学，高中辰光受鲁迅杂文影响，报考北大。当时北大中文系只收6个新生，罗竹风以成绩优异、录取了。伊个老师是熊十力、许地山，伊搭千家驹还有其他同学编了《北大新闻》。因为罗老博览群书，伊后首来担任《辞海》副主编，又主编《汉语大辞典》《中国大百科全书·宗教卷》，成为中国文字学搭宗教界个著名专家。 担任过出版局老领导个罗老深深晓得编辑工作个重要性，伊讲：“我认为编辑应该是杂家，所谓杂家，就是对各个领域个知识侪要懂一眼，略知一二还勿够，最好略知二三。首先，中国历史搭中国古典文学要系统学习，对中国古代史浪各个时期个重要历史事件搭仔人物要有所了解。第二，对哲学、社会学、风俗学、地理学、生物学也要涉猎一遍。第三，我建议侬手头常备《辞海·语词分册》，还有本《同义词词林》，搿些工具书特别有用，比方一个‘看’，就有三十多种，像视、瞧、顾、望、觑、瞅、窥咾啥……准确运用词语，是编辑必须掌握个基本功。”伊还鼓励我要主动出击，要编好一只大家欢喜个版面，编辑必须有意识个去组稿，特别要组织有影响力个名家为自家个副刊站台，侬要刻苦努力噢！” 罗老勒十年当中先后为我写了廿多篇文章：像《苦中作乐》《读书杂记》《学而思》《古稀手记》《不读书等于“心死”》《第七个本命年》等，还勒1988年为我个新作《秋天回眸话人生》写了篇热情鼓励个序言，伊笑咪咪个搭我讲：“侬四十挂零，我八十出头，我伲年龄正好相差一倍。”让我邪气感愧。罗老85岁逝世，我去参加追悼会，看到老多认得搭勿认得个编辑，有得两百多个人，大家侪满含深情个搭罗老告别，伊拉侪是罗老个真诚敬仰者。 编辑应该是杂家，是我伲后辈编辑个座右铭。  （作者近影） （晓歌 编辑） (责任编辑：晓歌) |
