家乡个芝麻米花糖
来源:新民晚报网 作者:吴毓 时间:2022-03-27 点击:
摄影/日升
文/吴 毓
眼睛一眨，春节已经过去一个多号头了，勿过春节之前备个年货还呒没吃光，特别是各种各样小零食仍旧装满好几只大抽屉，其中就有好几种口味个米花糖，因为搿是我心里最欢喜个家乡美食。
小辰光每年春节前后，老家安徽歙县个奶奶总会寄来一份家乡个土特产：有手工炼制个芝麻香油、自家屋里熏制个火腿，还有两只大箱子。箱子是用铁皮敲出来嗰，大约长宽40厘米，高80厘米，里向装满芝麻糖搭仔米花糖。芝麻糖是用安徽特产黑芝麻混合手工麦牙糖，用工具压制成块，再切成薄片。米花糖是拿大米用爆米花机爆成米花，添加饴糖压成块，同样切成薄片。装箱个辰光，先放一层芝麻糖，再放一层米花糖，一层层交替，码放得整整齐齐。
每趟收到搿三样土特产，对阿拉小朋友来讲，两只铁皮箱就是最有诱惑力个“魔箱”。阿爸总要拿搿两只箱子囥到隐蔽个地方，勿拨阿拉姐弟三个偷吃。埃歇辰光，阿拉住辣郊区个平房大院里，院子里一共三家人家，阿拉屋里有两间平房，搭仔一间勿到5平方米个储藏室。为了多放物事，阿爸用木板沿墙做了一排置物架，两只铁皮箱就放辣最高个搁板浪。过节期间，每天侪会拿出一点芝麻糖搭仔米花糖，放辣好看个玻璃糖果盒里，招待来拜年个亲眷搭仔来串门个朋友。阿拉姐弟三个也能沾光分到一点，压压馋虫。
有辰光吃得勿过瘾，就趁屋里大人勿注意，悄悄溜进储藏室，弟弟搬来小凳子，我踩着凳子爬上去，踮起脚，伸手从箱子里捞出几块芝麻米花糖，大家分分，慢慢掰开，一小片一小片放进嘴巴里。黑芝麻个香味、饴糖个清甜、爆米花个香软酥脆，真是越嚼越香浓，越品越有味，吃了还想吃。
一个月后阿爸打开铁箱子，箱子里空空荡荡，阿爸奇怪惊讶，阿拉一个个假装勿晓得。现在想来，阿拉搿点小动作阿爸肯定晓得嗰，伊拿箱子囥到储藏室里只是让阿拉适可而止，覅一下子吃得太多罢了。
可以讲，偷吃芝麻米花糖是阿拉童年里向最欢乐个事体。芝麻米花糖牵起了阿拉搭仔家乡亲人个甜蜜纽带。现在我也经常会上网订购家乡产个芝麻米花糖，只勿过再也吃勿出当年个滋味。搿就是“食多无滋味”了。
责任编辑：日升
