想起老早茶水摊

来源:阿拉老底子作者:侯宝良时间:2024-11-21 点击:

兔年春节刚刚过去，生活已逐渐恢复正常，楼下奶茶店门口小桌边喝茶聊天的人也越来越多，倒让我想起老早子的茶水摊。

老早上海街头巷尾有勿少“茶水摊”，就像北方人讲的“卖大碗茶”一样。阿拉电影里看到“卖大碗茶”就是辣集市浪撑块篷布，摆张台子，一把大茶壶、几个大陶碗，大热天里卖茶人拿把蒲扇勿停赶苍蝇，拔直喉咙吆喝：“大碗茶、卖大碗茶！”相对来讲，上海人摆“茶水摊”就显得文雅交关，一般侪是静悄悄摆辣上街沿或者弄堂口，一只小方台浪摆几只玻璃杯，杯子浪盖块小玻璃或者茶杯盖用来遮灰，考究一点的摊头，台子浪再铺块台布，看上去清清爽爽。

我小辰光屋里斜对面，就有一只茶水摊摆辣马路边，小方台子浪摆仔六七只倒满茶水的杯子，台脚边浪有两只热水瓶，里向是泡好的温热茶叶水，如果是热天，热水瓶里装的是放凉了的大麦茶，旁边一面盆清水是用来汏茶杯的。看摊头的是一对父女，记得有一年，坐辣茶摊边看摊的是一个小姑娘，瘦骨伶仃，文文静静，手里总是捧着一本书。

当时呒没保温杯，到户外做事体的人假使嘴巴干一般侪是寻一只自来水龙头，用手捧点自来水吃。比较讲究的人就到茶水摊来买茶。小杯茶一分洋钿，大杯二分洋钿。热天吃茶人勿少，比如踏三轮车、拉老虎塌车、摆地摊唱戏的人，侪会过来买杯茶，吃好就走。其实我小辰光，偶尔也会去买茶吃，因为当时我经常会辣困梦头里“画地图”（尿床），外婆就禁止我夜饭后吃茶。有辰光实在嘴巴干，只好去茶摊浪买杯茶吃，结果么夜里“地图”还是照画不误。外婆对我搿种毛病实在呒啥办法，后来有老中医告诉伊，搿是小人肾亏，一般大了以后就好了。

茶水摊侪是小本经营，生意最好的辰光是大热天。阿拉屋里附近有一家老虎灶，所以茶水摊泡开水邪气便当。从老虎灶泡两瓶开水只要二分洋钿，用的茶叶侪是茶叶店淘来的碎叶子，因为成本低，赚头应该还可以。

茶水摊浪的小姑娘嘴巴交关甜，每趟去老虎灶泡开水总归阿姨、爷叔叫勿停，老虎灶的老板娘特别欢喜迭个文文静静的小姑娘。老板娘男人早已过世，有个儿子辣煤炭店里当送货工，到了休息辰光，自家屋里勿去，就欢喜到小姑娘茶水摊浪去茄山河，老娘看辣眼里，喜辣心里，巴勿得伊拉恋爱早点谈成功，老虎灶好拨伊拉接盘。

有天吃饭辰光老娘打算轧轧苗头，就问儿子：“侬跟茶摊浪小姑娘谈得哪能啦？”儿子一听，眼乌子一弹：“姆妈侬瞎七搭八想点啥啦？小姑娘身体勿好，休学辣屋里，暂时出来帮阿爸看摊头。人家今年准备要考大学的，阿拉同事的丈人是老中医，我辣帮伊介绍看毛病的事体。”老娘一听，好比碰着黄梅天，太阳头里落场雨，心里想想就殟塞。

呒没想到，过仔一段辰光，“文革”开始了，小姑娘大学也勿考了。再讲百货店里也有买小巧玲珑，可以随身带的保温杯，冷水热水侪好放，交关讨人欢喜。乃末到茶水摊买茶的人越来越少，慢慢较茶水摊搭仔老虎灶也勿看见了。

刊于2023年2月19日《新民晚报》

责任编辑：日升

想起老早茶水摊

网友评论

相关内容