我和“读书乐”
来源:米舒 作者:王瑜明朱友好 时间:2024-04-30 点击:
六岁，我开始练书法。七岁辰光，我写了一幅书法作品“读书乐”，爷爷觉着我写得勿错，就拿迭幅字拨伊个朋友看。朋友看了之后，也觉着对一个七岁小囡来讲，写成迭能邪气勿错了，就拿迭幅作品推荐拨了伊个朋友——《新民晚报》“读书乐”版面个编辑米舒先生。
可能米舒先生看了之后，觉着应该要鼓励鼓励迭个小朋友学习书法个兴趣，乃末，就有了我第一趟勒《新民晚报》发表个作品：“读书乐”版面个刊头题字“读书乐”。
记得我个书法作品登报当天，我伲一家们侪开心得唻像煞过节一样，我伲到报摊浪买了30份报纸留作纪念，爸爸帮我拿作品剪下来夹勒我写字台个玻璃板下头。其它个报纸，侪囥了屋里摆重要物事个箱子里。
呒没多少辰光，我还收到了稿费10元，我是跟牢仔爸爸到邮局去领迭笔 “钞票”个。迭个对我学好书法是最大个鼓励。
还记得大学毕业参加《新民晚报》面试辰光，我也讲了埃歇横里个迭只故事，我搭夜报是有缘个，缘分从我7岁个辰光就开始了。
到新民晚报报社上班之后，我老想认得迭位米舒先生。上班两年之后，我有幸成为副刊部个编辑，真个认得了米舒先生，我也拿迭只故事讲拨伊听了，特别感谢伊埃歇横里采用我迭能一个呒没名气个小朋友个书法作品，作为版面刊头题字。再后来，我成为夜光杯个编辑，也愿意用一眼普通读者投来个质量勿错个稿件，因为我曾经体会过稿件被刊用个魔力，或许会让伊拉一直记了海，甚至对未来也会有邪气大个促进作用，迭个是后话。
自从“读书乐”书法作品被晚报刊登之后，我就邪气欢喜“读书乐”三个字。学书法，要写作品，需要起首章，会得刻章个表哥晓得仔后，就帮我刻了只“书乐”个闲章。我小辰光写个书法作品，侪用迭只章。
现在学习篆刻之后，我发现我个老师毛节民先生也刻过“读书乐”个章，就想自己也刻一只。
第一趟刻，印稿就写了十几遍，写来写去，总归觉着有勿对个地方。刻出来之后，拿拨毛老师看，老师一眼就看出了问题：三个字大小勿一样，“读”迭个字大而“书乐”二个字小，只好磨脱重新刻。
另外，伊还指出了我一只问题，用刀个方向勿对。再刻一遍，我改正了老师指出个问题，最重要个是调整了刀个方向。今朝到老师屋里去学习，老师又帮我修整了章面。
看成品“读书乐”个章，我又想起了7岁辰光写个读书乐，从手机里翻出来1992年12月9日个《新民晚报》“读书乐”版面，再次感慨，缘，真个是呒没办法用语言来形容。
（晓歌编辑）
