小辰光个一顿年夜饭（沪语）
来源:新民晚报网 作者:朱少伟 时间:2024-02-14 点击:
每趟去逛闹猛个上海老城隍庙，走过门庭若市个南翔馒头店，我就会回想起小辰光个一顿年夜饭。
埃歇辰光正是三年困难时期，因为爷娘侪勒解放军部队工作，刚刚六岁个我搭仔老阿奶住勒上海南市。老阿奶是个热心肠，经常帮隔壁邻居照顾小囡，所以弄堂里向个小八腊子侪跟伊来得亲热。
勒一个小年夜前头，我看见老阿奶坐辣海闷声勿响，就问伊：“侬勒想啥事体呀？”“弄堂口阿大、阿二个爷娘回乡下去处理急事体了；斜对面小妹一直跟外婆过日脚，现在外婆住进医院了；弄堂笃底大宝、二宝个爷娘厂里向忙，最近要天天加班；还有琴琴、英英咾啥……”老阿奶皱仔眉头讲，“迭眼小囡搿趟恐怕侪吃勿着年夜饭了！”
听了老阿奶迭番闲话，我也开始为伊拉担心。老阿奶突然立起来，走到灶披间里向，寻出平常勿舍得吃个两斤线粉、一包霉干菜、一小篮黄豆、一块咸肉、十只鸡蛋，笑眯眯对我话：“有办法了，阿拉就用自家屋里个全部存货，勒大年夜招待迭眼小囡。”我马上就表示赞成。
第二天早浪向，老阿奶又带了一只布袋乘车子去南翔镇。伊勒出门前头告诉我，搿是为了去跟一位做生产队队长个亲眷商量，拾一眼公社社员收摘花菜、卷心菜以后留勒地里向个老梗子搭仔老叶片。当天黄昏辰光，老阿奶回到屋里，除脱背仔一只涨鼓鼓个布袋，还拎仔两只扁扁个小竹篓。我接过小竹篓一看，发觉里向有一样物事是用荷叶包起来嗰，心里有点好奇，就问：“搿是啥物事呀？”老阿奶笑嘻嘻回答：“搿是一样上海有名个点心。”又神秘兮兮讲：“侬大概还勿晓得伊是啥味道呢！”
到仔大年夜，阿拉屋里铺开一只圆台面，上面摆仔七只碟子八只碗，还有八副长短勿一样个筷子，搿侪是六个小囡从自家屋里带过来嗰。阿拉搿点小八腊子本来就是弄堂里一道白相个小伙伴，搿歇辰光碰勒一道，真是交关扎劲。虽然台面浪个“冷盆”只有萝卜头、咸白菜、五香豆、炒螺蛳，但阿拉侪急勿可待，马上坐到圆台面旁边，嘻嘻哈哈，感觉过年味道特别浓。
灶披间里，老阿奶一歇汏，一歇斩，一歇烧，忙得团团转。呒没多少辰光，一盘盘小菜陆陆续续端出来，有咸肉笃黄豆、霉干菜烧线粉、花菜炒咸肉、大葱炒鸡蛋，还有卷心菜汤咾啥。最后，老阿奶端出两只冒热气个大盘子，向大家介绍：“搿就是有一百多年历史个南翔小笼馒头，伊个特点是皮子蛮薄、汁水蛮多、馅子蛮大、外形蛮别致。亻那搿点小朋友大概侪呒没吃过，我也有几年呒没吃了，搿趟专门买仔两笼让大家享口福！”乃末，小八腊子侪来煞勿及伸出筷子。
我搛起一只小笼馒头，发觉伊小巧玲珑赛过小宝塔，而且半透明；戳破脱皮子，蘸眼香醋搭仔姜丝，咬一口，一嘴巴汤汁邪气鲜。我灵机一动，建议大家用卷心菜汤代替汽水，一道“干杯”，祝愿新年吉祥如意，气氛一下子热烈起来，欢声笑语接连勿断……
勒当年吃个物事老少个艰苦日脚里向，南翔小笼馒头让一顿特殊个年夜饭变得圆满。我也从此对迭样上海传统美食留下了深刻印象。
责任编辑：日升
