老来重圆儿时梦
来源:新民晚报网 作者:裴天蓉 时间:2023-08-16 点击:
截屏图片
上世纪五六十年代出生个小人，现在蛮多侪是有第三代小人了，伊拉看到现在个小人搭伊拉小辰光完全是两种生活，就像现在个马路，名字还是原来个名字，面貌完全勿一样了。
老早有个远房亲眷住辣嘉善路一条弄堂口个过街楼上，埃歇辰光搿种房子蛮多个，楼下一般会有人摆摊头，比如皮匠摊、修鞋摊、水果摊。辣搿搭摆摊头个好处勿少，比如：弄堂口人来人往客流多；碰着落雨也勿会淋湿……阿拉亲眷楼下倒呒没人摆摊头，我每趟去总归看到坐仔交关人，老老小小坐辣一道，谈谈山海经，听听过街楼里传出来个歌声琴声。我印象比较深个是，过街楼房顶上有一扇老虎窗，窗边放仔一盆花，蛮弹眼落睛个。
埃歇辰光我辣读中学，每年放暑假，总归要去走几趟亲眷，开始是阿拉阿爸带我去个，去过以后觉得蛮好白相就自家去了。伊拉屋里有一个阿哥、一个阿妹，阿哥跟我同龄，会拉小提琴，阿妹会唱歌，唱得邪气好听。当时有一个电影叫《马路天使》，老演员赵丹、周璇等人主演，电影里有一幕赵丹一边拉二胡，一边从老房子窗口伸出头来，周璇辣对面窗口唱歌。周璇唱得自然好听，我特别欢喜听伊唱个《四季歌》。勿晓得啥原因，我每趟走到伊拉弄堂口，听到老虎窗里传出来个歌声，总会想起《马路天使》里个画面。或许是因为阿妹个歌声像周璇一样软糯甜美。
要走上过街楼，需要经过一段又陡又窄个木楼梯，我总会尽量放轻脚步，因为楼梯木板软绵绵个像弹簧，还会发出吱吱嘎嘎个声音，我邪气担心会踩坏楼梯。进到伊拉屋里，伊拉姆妈对我邪气热情，嘘寒问暖，还拿出各种吃食招待我，弄得我邪气勿好意思。伊拉兄妹看到我，打过招呼就继续拉琴唱歌，邪气专心。
或许是经常受到音乐个熏陶，我有了想要学乐器个想法。有一天，我回到屋里就去问姆妈，能勿能帮我买一个乐器，小提琴或者二胡侪可以。现在爷娘听到小人想要学乐器肯定邪气开心，可惜当年屋里经济勿宽裕，买乐器是一桩大事体，阿爸姆妈反复商量，最后还是呒没同意。
几十年过去，我也已经退休了。为了圆小辰光个梦想，去老年大学报了一只二胡班。老年大学离嘉善路勿远，我经常会走过去转转看看。小辰光个“过街楼”早已消失，一眼看去侪是高楼大厦，但是我还是会停下脚步寻找记忆中个老房子。我现在会拉交关曲子了，《赛马》《江河水》……水平不是一眼眼，因为阿拉已经不是当年个小姑娘了。
责任编辑：日升
