记忆里个一缕酒香
来源:新民晚报网 作者:任炽越 时间:2022-03-09 点击:
摄影/日升
文/任炽越
小辰光，过年就是过张嘴巴，从年三十个年夜饭到正月十五个元宵，侪离不开一个“吃”字。其中拨我印象最深嗰，还要算姆妈亲手做个甜酒酿。
记得埃歇辰光，春节之前一个礼拜，姆妈就会亲自动手做一坛甜酒酿，伊总是对我讲，侬覅小看搿一坛酒酿，亲眷朋友来拜年，烧点酒酿圆子、酒酿年糕、酒酿荷包蛋，招待客人既好吃又体面，酒酿可以派大用场！至于为啥只辣春节前后做酒酿，主要是因为做酒酿需要用到糯米，糯米平常买勿到，只有春节期间可以凭购粮证到粮油商店买几斤。
做酒酿个过程倒也勿算复杂：先烧一锅米饭，其中加点糯米，拿米饭倒进汏干净个面盆里，摊开拨散，等饭凉透，拿做酒酿个酒药拌进去。再拿拌过酒药个米饭盛到一只钵斗里，摊平，中央用小酒杯压一只小坑。然后拿钵斗放进稻草编织个保温饭窠里，外面用旧棉袄捂起来，让伊发酵。过脱二三天，会有一阵阵酒香飘出来，说明酒酿可以吃了。
当然，按照姆妈个讲法，做酒酿有几道关键工序，做得好勿好完全靠经验。首先是烧好个米饭需要软硬适中，既勿能太湿，也勿要太干。其次是放酒药要适量，放多了做出酒酿会发酸，放少了发酵勿充分。第三是发酵辰光长短要合适，开早了会夹生，开晚了会酸臭，搿需要靠鼻头去闻，根据散出来个酒香进行判断。
姆妈辣弄堂里做酒酿是有名气嗰，每年做个酒酿侪是又香又甜，让阿拉馋吐水溚溚渧。
记忆里，姆妈做酒酿个辰光，也是我放寒假个辰光，平常欢喜到外面寻同学白相，但姆妈拿制作酒酿个钵斗捂起来以后，我就呒没心思出门了，有空就辣饭窠周围转来转去，仔细辨别空气里是勿是有酒香飘出来。有辰光好像闻到了酒香就会告诉姆妈。阿姆听了笑眯眯，对阿拉讲：覅急，覅急，辰光还呒没到。
一天天过去，我一点点失去了耐心……然后某一天个傍晚，姆妈宣布：今朝酒酿可以开锅了！
阿拉听到，顿时围拢过去，心里既开心又有点担心，勿晓得酒酿能勿能做成功。姆妈轻轻掀开棉袄，打开饭窠，揭开钵斗口个封条，可以看到里向个米粒晶莹润泽，之前用酒杯压出来个小坑里有一汪清亮的液体，灯光一照，亮晶晶嗰，空气里一缕酒香沁人心脾，让我至今记忆犹新。
责任编辑：日升
