滋补养身姜母鸭
来源:新民晚报网 作者:沈一珠 时间:2021-12-18 点击:
摄影/日升
烧菜勿辛苦，写烧菜辛苦。勿对，写烧菜也勿辛苦，就是家常好吃小菜像烂糊肉丝、蟹粉蛋之类基本写过一轮了。勿是家常个菜，因为条件有限，烧起来勿便当，所以勿想写；比方讲烤鸭，正是秋高鸭肥个日脚，连得鸭蛋炒出来侪是厚笃笃香喷喷嗰。
勿过，讲一遍哪能用电烤箱，上火下火各调好温度多少，烤半只鸭子出来，有啥意思呢？有些人可能根本呒没电烤箱。还勿如到屋里附近寻只果木烤鸭店，下单，坐下来，等半个钟头左右，侬就可以吃到香喷喷个烤鸭了：肉批下来了，配薄饼、葱、黄瓜丝搭仔甜面酱；鸭壳落也拨侬嗰，斩几只水漉漉个萝卜，笃半个钟头，变壳为宝，就是一锅暖融融个鸭汤了。
既然从烤鸭讲到了汤，又加上天气预报讲，近抢把可能有寒流来袭。索介抄一只姜母鸭个做法，是从一本叫《节气厨房》个书里摘来嗰，作者叫梅依旧，美食作者应该有如此诗意个名字，本来，“柴米油盐”之后就有“诗酒花”嗰。
姜母鸭材料：鸭子半只，红枣三五颗，枸杞一小把，各种配料各少许：八角、桂皮、甘草、草果、香叶、良姜、党参、山药、陈皮、黄芪、五味子。
调料：姜半斤左右，米酒一碗，盐、糖各适量。
做法：各种材料装进料包，红枣、枸杞用温水泡软，姜汏好，一半切丝，一半切片，备用。
鸭子汏清爽，切成块，冷水下锅，焯水，捞出来；镬子里加油烧热，拿姜片煸香，再加鸭块一道煸炒，加适量盐、糖，再倒入米酒，翻炒均匀。镬子里倒适量清水，放红枣、枸杞和料包，大火烧开，转小火笃一个钟头，出锅前倒入姜丝，稍许滚一滚就好吃了。
上海人烧菜欢喜用黄酒，迭只菜是台式滋补汤，顶好用广东米酒，差迭能一点点，可能就出勿来姜母鸭独有个味道了。
责任编辑：日升
