老早秋天 女人最忙
来源:新民晚报网 作者:侯宝良 时间:2023-12-06 点击:
摄影/日升
文/侯宝良
看现在阿姨妈妈们辣秋天里到处忙聚会、拍照个开心样子，我想起从前迭歇辰光是伊拉一年当中为家里准备过冬个最忙辰光。老早上海秋天辰光最短，到了九月份，白天太阳晒辣海，感觉蛮热个，一早一晚就感觉冷丝丝了。一般过了十月份，大家侪要穿长袖衣裳了，假使碰着暴冷，还要穿绒线衫绒线裤。勿像现在，到了11月初，还有勿少人穿仔短袖衫到处跑。
老早上海人家生活水平侪勿高，住房条件也勿好，上海女人又讲究生活精致，屋里住个人口多，老人小人侪住辣一道，掌握居家“一把手”权力个家庭主妇要拿老老小小侪照顾好，到了秋天，就是一年里最忙个辰光。
大热天里汏好、晒干个绒线早点拿出来，抓紧辰光结绒线。小人身体长得快，去年个绒线衫绒线裤显得小了，需要重新编织一套。还要为老人、老公添几件毛衣围巾。搿排事体热天手里出汗勿好做，趁秋天凉爽要抢辣冷天前头快点做脱。小人多个人家，单鞋、棉鞋不够了要做。热天里用零碎布刮好浆糊，贴出来晒挺括个衬料，翻出来剪鞋样、做鞋面、垫棉花，搿眼事体侪要亲手做好，才好交拨隔壁个“老皮匠”上鞋底。讲到鞋底，也是女人平常日脚，抽空一针一针扎出来个，北方叫纳鞋底，上海闲话叫“扎鞋底”。我曾经写过题为《想起老早个布鞋底》个文章：
扎鞋底先要用烟纸店有买个草秆编结物事贴辣纸头浪个纸板，上海人叫“荷包板”。再按照勿同个脚寸画样，用剪刀剪出鞋底样，用布滚条包缝好一圈毛边，再用零碎布料一层层用浆糊贴上去，足足要叠2厘米厚，用针线暂时跟鞋底样固定，沿鞋样剪脱多余布料。考究个面浪一层要用新布，而且大鞋样一圈，卷进毛边开始二毫米一针相等距离“扎”一圈，边浪有毛边就用浆糊刮一层封牢。因为鞋底邪气厚，针难戳进去，搿辰光戴辣手指浪个“顶针箍”就派用场了，针屁股放辣顶针箍个凹坑里，用力慢慢顶进针头。针穿过鞋底以后，要想拔出来也勿容易，需要用到钳子。一针又一针、一圈又一圈，一只43码个鞋底需要扎六百多针，两只鞋底就是一千两百多针，葛咾有人讲“千纳底”一眼勿过分。扎好鞋底，还要做鞋面，从前为了节约布票，一般家庭尽量勿买布店里现成个鞋面布，侪是自家用做衣裳个布头裁剪个。
想想介许多事体侪要女人们辣秋天里完成，真是蛮忙个。要是上班个女人就更加忙了，所以单位里午休、开会，一眼看过去，女同志们勿是辣“结绒线”，就是辣“扎鞋底”，侪是见缝插针个行家里手。平常吃好夜饭，或者稍有空闲，女人手里是勿停个。
除此以外，一家人想要冬天里过得惬意，秋天里女人还有勿少翻翻晒晒个事体。搿眼事体虽然侪是辣屋里做个，外面人看勿到，但是到了冬天，就可以从大人小人身浪向看出来，做得好个，邻舍道里会称赞一声：“搿家个女人老会过日脚哦！”摆到单位里就是“劳动模范”称号。
责任编辑：日升
